Punjab ‘ਚ ਹਿਮਾਚਲ ਦੇ ਟੈਕਸੀ ਡਰਾਈਵਰ ਦੀ ਲੱਗੀ 3 ਕਰੋੜ ਰੁਪਏ ਦੀ ਲਾਟਰੀ, ਬਠਿੰਡਾ ਆਇਆ ਸੀ ਸਵਾਰੀ ਛੱਡਣ  

Taxi Driver Lottery in Punjab : ਹਿਮਾਚਲ ਪ੍ਰਦੇਸ਼ ਦੇ ਕਾਂਗੜਾ ਜ਼ਿਲ੍ਹੇ ਦੇ ਇੱਕ ਟੈਕਸੀ ਡਰਾਈਵਰ ਦੀ ਪੰਜਾਬ ਵਿੱਚ 3 ਕਰੋੜ ਰੁਪਏ ਦੀ ਲਾਟਰੀ ਨਿਕਲੀ ਹੈ। ਕਲਿਆਣ ਚੰਦ ਜਦੋਂ ਬਠਿੰਡਾ ਵਿੱਚ ਸਵਾਰੀ ਛੱਡਣ ਆਏ ਸਨ ਤਾਂ ਉਨ੍ਹਾਂ ਨੇ 500-500 ਰੁਪਏ ਦੀਆਂ ਦੋ ਲਾਟਰੀ ਟਿਕਟਾਂ ਖਰੀਦੀਆਂ ਸਨ। ਉਨ੍ਹਾਂ ਦੱਸਿਆ ਕਿ ਇਸ ਵੇਲੇ ਉਹ ਮਹੀਨੇ ਵਿੱਚ ਮੁਸ਼ਕਿਲ ਨਾਲ 15 ਤੋਂ 16 ਹਜ਼ਾਰ ਰੁਪਏ ਹੀ ਕਮਾ ਪਾਉਂਦੇ ਹਨ। ਹਾਲਾਤ ਐਸੇ ਸਨ ਕਿ ਕਈ ਵਾਰ ਉਨ੍ਹਾਂ ਨੂੰ ਦਿਹਾੜੀ ਵੀ ਕਰਨੀ ਪੈਂਦੀ ਸੀ।

ਕਲਿਆਣ ਚੰਦ ਦੇ ਪਰਿਵਾਰ ਵਿੱਚ ਪਿਤਾ, ਭਰਾ-ਭੈਣਾਂ, ਪਤਨੀ, ਦੋ ਪੁੱਤਰ ਅਤੇ ਇੱਕ ਧੀ ਹਨ। ਉਨ੍ਹਾਂ ਕਿਹਾ ਕਿ ਉਹ ਆਪਣੇ ਪਿਤਾ ਦਾ ਸੁਪਨਾ ਪੂਰਾ ਕਰਨਾ ਚਾਹੁੰਦੇ ਹਨ। ਉਨ੍ਹਾਂ ਦੇ ਮੁਤਾਬਕ ਇੱਕ ਸਰਾਏ ਦੀ ਇਮਾਰਤ ਪਹਿਲਾਂ ਮੌਜੂਦ ਸੀ, ਜੋ ਹੁਣ ਜਰਜਰ ਹੋ ਕੇ ਢਹਿ ਚੁੱਕੀ ਹੈ। ਹੁਣ ਉੱਥੇ ਨਵੀਂ ਇਮਾਰਤ ਬਣਾਈ ਜਾਵੇਗੀ। ਦੱਸਣਯੋਗ ਹੈ ਕਿ ਲਾਟਰੀ ਦਾ ਨਤੀਜਾ 13 ਜੂਨ ਨੂੰ ਆਇਆ ਸੀ।

ਕਲਿਆਣ ਚੰਦ ਨੇ ਦੱਸਿਆ ਕਿ ਉਹ ਕਾਂਗੜਾ ਜ਼ਿਲ੍ਹੇ ਦੀ ਫਤਿਹਪੁਰ ਤਹਿਸੀਲ ਦੇ ਰਹਿਣ ਵਾਲੇ ਹਨ ਅਤੇ ਪਿਛਲੇ 20 ਸਾਲਾਂ ਤੋਂ ਵੱਧ ਸਮੇਂ ਤੋਂ ਡਰਾਈਵਰੀ ਕਰ ਰਹੇ ਹਨ। ਜਿਸ ਦਿਨ ਉਨ੍ਹਾਂ ਨੇ ਟਿਕਟ ਖਰੀਦੀ ਸੀ, ਉਸ ਦਿਨ ਉਹ ਬਠਿੰਡਾ ਗਏ ਹੋਏ ਸਨ।

ਉਨ੍ਹਾਂ ਦੱਸਿਆ ਕਿ ਸਾਲ 2021 ਵਿੱਚ ਉਨ੍ਹਾਂ ਨੇ ਲਾਟਰੀ ਦੀਆਂ ਟਿਕਟਾਂ ਖਰੀਦਣੀਆਂ ਸ਼ੁਰੂ ਕੀਤੀਆਂ ਸਨ। ਪਿਛਲੇ ਸਾਲ 11 ਕਰੋੜ ਰੁਪਏ ਦੀ ਲਾਟਰੀ ਬਾਰੇ ਸੁਣਿਆ ਸੀ ਕਿ ਉਹ ਬਠਿੰਡਾ ਦੇ ਰਤਨ ਲਾਟਰੀ ਵਾਲਿਆਂ ਦੀ ਟਿਕਟ ‘ਤੇ ਨਿਕਲੀ ਸੀ। ਇਸ ਤੋਂ ਬਾਅਦ ਜਦੋਂ ਵੀ ਉਹ ਬਠਿੰਡਾ ਆਉਂਦੇ, ਉਸੇ ਦੁਕਾਨ ਤੋਂ ਟਿਕਟ ਖਰੀਦਦੇ ਸਨ।

ਕਲਿਆਣ ਚੰਦ ਨੇ ਕਿਹਾ ਕਿ ਉਹ ਉਸ ਵੇਲੇ ਲਾਈਨ ਵਿੱਚ ਖੜ੍ਹੇ ਸਨ ਅਤੇ ਇਹ ਸਭ ਪਰਮਾਤਮਾ ਦੀ ਕਿਰਪਾ ਹੈ। ਉਨ੍ਹਾਂ ਨੇ ਪਰਮਾਤਮਾ ਦਾ ਧੰਨਵਾਦ ਵੀ ਕੀਤਾ। ਉਨ੍ਹਾਂ ਦੱਸਿਆ ਕਿ ਜਿਸ ਦਿਨ ਟਿਕਟ ਖਰੀਦੀ ਸੀ, ਉਸ ਦਿਨ ਉਹ ਦਿਹਾੜੀ ‘ਤੇ ਸਨ ਅਤੇ ਇੱਕ ਸਵਾਰੀ ਨੂੰ ਛੱਡਣ ਗਏ ਹੋਏ ਸਨ।

ਕਲਿਆਣ ਨੇ ਹੱਸਦਿਆਂ ਦੱਸਿਆ ਕਿ ਉਨ੍ਹਾਂ ਨੂੰ ਪਤਾ ਸੀ ਕਿ ਯੂਟਿਊਬ ‘ਤੇ ਲਾਟਰੀ ਦਾ ਲਾਈਵ ਨਤੀਜਾ ਦਿਖਾਇਆ ਜਾਂਦਾ ਹੈ। ਨਤੀਜੇ ਵਾਲੇ ਦਿਨ ਉਹ ਲਾਈਵ ਰਿਜ਼ਲਟ ਦੇਖ ਰਹੇ ਸਨ। ਪਹਿਲਾਂ ਛੋਟੇ ਨੰਬਰ ਨਿਕਲ ਰਹੇ ਸਨ ਅਤੇ ਉਨ੍ਹਾਂ ਦਾ ਨੰਬਰ ਨਹੀਂ ਆਇਆ। ਫਿਰ 8 ਅਤੇ 9 ਵਾਲੇ ਅੰਕ ਦਿਖਾਈ ਦੇਣ ਲੱਗੇ। ਉਨ੍ਹਾਂ ਨੇ ਦੇਖਿਆ ਕਿ ਇਹ ਨੰਬਰ ਤਾਂ ਉਨ੍ਹਾਂ ਦੀ ਟਿਕਟ ‘ਤੇ ਵੀ ਹੈ।

ਜਿਵੇਂ ਹੀ ਪੂਰੇ ਚਾਰ ਅੰਕ ਦਿਖਾਏ ਗਏ, ਉਹ ਹੈਰਾਨ ਰਹਿ ਗਏ ਕਿਉਂਕਿ ਉਹੀ ਨੰਬਰ ਉਨ੍ਹਾਂ ਕੋਲ ਸੀ। ਇਸ ਦੌਰਾਨ ਉਨ੍ਹਾਂ ਨੂੰ ਬੇਹੱਦ ਖੁਸ਼ੀ ਹੋਈ। ਲਾਟਰੀ ਨਿਕਲਣ ਤੋਂ ਬਾਅਦ ਸਭ ਤੋਂ ਪਹਿਲਾਂ ਉਨ੍ਹਾਂ ਨੇ ਇਹ ਖੁਸ਼ਖਬਰੀ ਆਪਣੀ ਪਤਨੀ ਨਾਲ ਸਾਂਝੀ ਕੀਤੀ।