Jalandhar ‘ਚ ਗੈਸ ਸਿਲੰਡਰ ਨਾ ਮਿਲਣ ‘ਤੇ ਲੋਕਾਂ ਨੇ ਸੜਕ ਕੀਤੀ ਜਾਮ , ’25 ਦਿਨਾਂ ਤੋਂ ਸਪਲਾਈ ਨਹੀਂ ਮਿਲੀ ,ਬਲੈਕ ‘ਚ 3 ਹਜ਼ਾਰ ਦਾ ਮਿਲ ਰਿਹਾ ਸਿਲੰਡਰ’

Jalandhar News : ਜਲੰਧਰ ਦੀ 120 ਫੁੱਟ ਸੜਕ ‘ਤੇ ਗੈਸ ਸਿਲੰਡਰ ਨਾ ਮਿਲਣ ਕਰਕੇ ਪ੍ਰੇਸ਼ਾਨ ਜਨਤਾ ਨੇ ਸੜਕ ਜਾਮ ਕਰਕੇ ਵਿਰੋਧ ਪ੍ਰਦਰਸ਼ਨ ਕੀਤਾ। ਲੋਕਾਂ ਦਾ ਆਰੋਪ ਹੈ ਕਿ ਬੁਕਿੰਗ ਦੇ 25 ਦਿਨਾਂ ਬਾਅਦ ਵੀ ਉਨ੍ਹਾਂ ਨੂੰ ਸਿਲੰਡਰ ਨਹੀਂ ਮਿਲ ਰਹੇ ,ਜਦੋਂ ਕਿ ਬਲੈਕ ਵਿੱਚ ਗੈਸ ਬਹੁਤ ਜ਼ਿਆਦਾ ਕੀਮਤਾਂ ‘ਤੇ ਉਪਲਬਧ ਹੈ। ਪੁਲਿਸ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਸਥਿਤੀ ਨੂੰ ਸ਼ਾਂਤ ਕੀਤਾ।

ਬਸਤੀ ਬਾਬਾ ਖੇਲ ਇਲਾਕੇ ਵਿੱਚ ਗੈਸ ਦੀ ਭਾਰੀ ਕਿੱਲਤ ਮਹਿਸੂਸ ਕੀਤੀ ਜਾ ਰਹੀ ਹੈ। ਪ੍ਰਦਰਸ਼ਨਕਾਰੀ ਮਮਤਾ ਦੇਵੀ ਨੇ ਕਿਹਾ ਕਿ ਸਿਲੰਡਰ ਬੁੱਕ ਕੀਤੇ 14 ਤੋਂ 25 ਦਿਨ ਬੀਤ ਗਏ ਹਨ ਪਰ ਸਪਲਾਈ ਦਾ ਕੋਈ ਸੰਕੇਤ ਨਹੀਂ ਹੈ। ਸਥਿਤੀ ਇੰਨੀ ਭਿਆਨਕ ਹੈ ਕਿ ਘਰਾਂ ਵਿੱਚ ਚੁੱਲਾ ਨਾ ਜਲਨ ਕਾਰਨ ਭੁੱਖੇ ਰਹਿਣ ਲਈ ਮਜਬੂਰ ਹਨ।

ਅਮਨ ਗੈਸ ਏਜੰਸੀ ਵਿਰੁੱਧ ਫੁੱਟਿਆ ਗੁੱਸਾ 

ਸਥਾਨਕ ਨਿਵਾਸੀ ਅਮਰੂ ਨੇ ਕਿਹਾ ਕਿ ਉਸਨੂੰ ਪੰਜ ਦਿਨ ਪਹਿਲਾਂ ਇੱਕ ਮੈਸੇਜ ਆਇਆ ਸੀ ਕਿ ਸਿਲੰਡਰ ਮਿਲ ਜਾਵੇਗਾ। ਹਾਲਾਂਕਿ, ਜਦੋਂ ਉਹ ਏਜੰਸੀ ਪਹੁੰਚੇ ਤਾਂ ਤਾਲਾ ਲੱਗਿਆ ਹੋਇਆ ਸੀ। ਲੋਕਾਂ ਦਾ ਆਰੋਪ ਹੈ ਕਿ ਏਜੰਸੀ ਸੰਚਾਲਕ ਉਨ੍ਹਾਂ ਦੇ ਫੋਨ ਨਹੀਂ ਚੁੱਕ ਰਹੇ ਹਨ ਅਤੇ ਆਪਣੇ ਦਫ਼ਤਰ ਬੰਦ ਕਰ ਦਿੱਤੇ ਹਨ, ਜਿਸ ਨਾਲ ਖਪਤਕਾਰਾਂ ਦੀਆਂ ਸਮੱਸਿਆਵਾਂ ਵਧ ਰਹੀਆਂ ਹਨ।

ਬਲੈਕ ‘ਚ 3000 ਦਾ ਮਿਲ ਰਿਹਾ ਸਿਲੰਡਰ 

ਪ੍ਰਦਰਸ਼ਨਕਾਰੀਆਂ ਨੇ ਇਹ ਵੀ ਗੰਭੀਰ ਆਰੋਪ ਲਗਾਇਆ ਕਿ ਆਮ ਖਪਤਕਾਰ ਕਾਨੂੰਨੀ ਤੌਰ ‘ਤੇ ਸਿਲੰਡਰ ਪ੍ਰਾਪਤ ਕਰਨ ਵਿੱਚ ਅਸਮਰੱਥ ਹਨ, ਬਲੈਕ ਵਿੱਚ ਗੈਸ ਦੀ ਕੋਈ ਕਮੀ ਨਹੀਂ ਹੈ। ਲੋਕਾਂ ਦੇ ਅਨੁਸਾਰ ਸਿਲੰਡਰ ਗੈਰ-ਕਾਨੂੰਨੀ ਤੌਰ ‘ਤੇ 3,000 ਰੁਪਏ ਤੱਕ ਵੇਚੇ ਜਾ ਰਹੇ ਹਨ। ਰੋਜ਼ਾਨਾ ਮਜ਼ਦੂਰਾਂ ਲਈ ਇੰਨੀ ਵੱਡੀ ਰਕਮ ਦੇਣਾ ਅਸੰਭਵ ਹੈ।

ਬਸਤੀ ਬਾਬਾ ਖੇਲ ਦੇ ਐਸਐਚਓ ਜਤਿੰਦਰ ਸਿੰਘ ਪੁਲਿਸ ਫੋਰਸ ਨਾਲ 120 ਫੁੱਟ ਰੋਡ ‘ਤੇ ਪਹੁੰਚੇ। ਉਨ੍ਹਾਂ ਪ੍ਰਦਰਸ਼ਨਕਾਰੀਆਂ ਨੂੰ ਰੋਡ ਖਾਲੀ ਕਰਨ ਲਈ ਮਨਾ ਲਿਆ। ਐਸਐਚਓ ਨੇ ਕਿਹਾ ਕਿ ਉਨ੍ਹਾਂ ਨੇ ਗੈਸ ਏਜੰਸੀ ਦੇ ਅਧਿਕਾਰੀਆਂ ਨਾਲ ਗੱਲ ਕੀਤੀ ਹੈ ਅਤੇ ਜਲਦੀ ਹੀ ਸਪਲਾਈ ਬਹਾਲ ਕਰ ਦੇਣਗੇ ਅਤੇ ਜਨਤਾ ਦੀ ਸਮੱਸਿਆ ਦਾ ਹੱਲ ਕਰਨਗੇ।

ਹੋਰ ਪੜ੍ਹੋ