Home / Punjabi News / ਅੰਮ੍ਰਿਤਸਰ ਰੇਲ ਹਾਦਸੇ ‘ਤੇ ਪ੍ਰਬੰਧਕਾਂ ਤੇ ਫਾਟਕ ਦੇ ਗੇਟਮੈਨ ‘ਤੇ ਵਰ੍ਹੇਗਾ ਕੈਪਟਨ ਦਾ ਡੰਡਾ

ਅੰਮ੍ਰਿਤਸਰ ਰੇਲ ਹਾਦਸੇ ‘ਤੇ ਪ੍ਰਬੰਧਕਾਂ ਤੇ ਫਾਟਕ ਦੇ ਗੇਟਮੈਨ ‘ਤੇ ਵਰ੍ਹੇਗਾ ਕੈਪਟਨ ਦਾ ਡੰਡਾ

ਅੰਮ੍ਰਿਤਸਰ ਰੇਲ ਹਾਦਸੇ ‘ਤੇ ਪ੍ਰਬੰਧਕਾਂ ਤੇ ਫਾਟਕ ਦੇ ਗੇਟਮੈਨ ‘ਤੇ ਵਰ੍ਹੇਗਾ ਕੈਪਟਨ ਦਾ ਡੰਡਾ

ਚੰਡੀਗੜ੍ਹ: ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਅੰਮ੍ਰਿਤਸਰ ਰੇਲ ਹਾਦਸੇ ਦੀ ਜਾਂਚ ਪੂਰੀ ਹੋਣ ਤੋਂ ਬਾਅਦ ਰੇਲਵੇ ਕ੍ਰਾਸਿੰਗ ਦੇ ਗੇਟਮੈਨ ਅਤੇ ਪ੍ਰਬੰਧਕਾਂ ਉੱਪਰ ਸਖ਼ਤ ਕਾਰਵਾਈ ਦੇ ਹੁਕਮ ਦਿੱਤੇ ਹਨ। ਰਿਪੋਰਟ ਵਿੱਚ ਸਥਾਨਕ ਸਰਕਾਰਾਂ ਬਾਰੇ ਮੰਤਰੀ ਨਵਜੋਤ ਸਿੰਘ ਸਿੱਧੂ ਅਤੇ ਉਨ੍ਹਾਂ ਦੀ ਪਤਨੀ ਨਵਜੋਤ ਕੌਰ ਸਿੱਧੂ ਨੂੰ ਕਲੀਨ ਚਿੱਟ ਦਿੱਤੀ ਗਈ ਹੈ। ਬੀਤੀ 19 ਅਕਤੂਬਰ ਨੂੰ ਅੰਮ੍ਰਿਤਸਰ ਦੇ ਜੌੜਾ ਫਾਟਕ ਨੇੜੇ ਦੁਸ਼ਹਿਰਾ ਦੇਖ ਰਹੇ ਲੋਕਾਂ ਉੱਪਰ ਟਰੇਨ ਚੜ੍ਹਨ ਕਾਰਨ 61 ਜਣਿਆਂ ਦੀ ਮੌਤ ਹੋ ਗਈ ਸੀ ਅਤੇ ਜਲੰਧਰ ਦੇ ਡਿਵੀਜ਼ਨ ਕਮਿਸ਼ਨਰ ਬੀ. ਪੁਰੂਸ਼ਾਰਥਾ ਨੇ ਇਸ ਘਟਨਾ ਦੀ ਜਾਂਚ ਕਰ ਮੁੱਖ ਮੰਤਰੀ ਨੂੰ ਰਿਪੋਰਟ ਸੌਂਪੀ ਸੀ।

ਮੁੱਖ ਮੰਤਰੀ ਦਫ਼ਤਰ ਵੱਲੋਂ ਜਾਰੀ ਪ੍ਰੈਸ ਬਿਆਨ ਮੁਤਾਬਕ ਜਾਂਚ ਰਿਪੋਰਟ ਵਿੱਚ ਲਿਖਿਆ ਗਿਆ ਹੈ ਕਿ ਬੇਸ਼ੱਕ ਰੇਲ ਲਾਈਨਾਂ ‘ਤੇ ਖੜ੍ਹਨਾ ਲੋਕਾਂ ਦੀ ਗ਼ਲਤੀ ਸੀ ਪਰ ਪ੍ਰਬੰਧਕਾਂ ਨੇ ਇਸ ਸਮਾਗਮ ਮੌਕੇ ਸੁਰੱਖਿਆ ਨੂੰ ਅਣਗੌਲਿਆ ਕੀਤਾ ਹੈ। ਰਿਪੋਰਟ ਵਿੱਚ ਪੁਲਿਸ ਅਤੇ ਮਿਊਂਸੀਪਲ ਕਾਰਪੋਰੇਸ਼ਨ ਵੱਲੋਂ ਕਾਨੂੰਨ ਦੀ ਪਾਲਨਾ ਕਰਵਾਉਣ ਵਿੱਚ ਕੁਤਾਹੀ ਕਰਨ ਦਾ ਦੋਸ਼ੀ ਐਲਾਨਿਆ ਗਿਆ ਹੈ।

ਜਾਂਚ ਰਿਪੋਰਟ ਵਿੱਚ ਸਿੱਟਾ ਕੱਢਿਆ ਗਿਆ ਹੈ ਕਿ ਜੌੜਾ ਫਾਟਕ ਨੇੜੇ ਗੇਟ ਨੰ. 27 ‘ਤੇ ਤਾਇਨਾਤ ਗੇਟਮੈਨ ਅਮਿਤ ਸਿੰਘ ਨੇ ਆਪਣੀ ਡਿਊਟੀ ਨੂੰ ਠੀਕ ਢੰਗ ਨਾਲ ਨਹੀਂ ਨਿਭਾਇਆ ਅਤੇ ਗੰਭੀਰ ਗ਼ਲਤੀ ਵੀ ਕੀਤੀ। ਉਹ ਸੌਖਿਆਂ ਹੀ ਇਸ ਵੱਡੇ ਹਾਦਸੇ ਨੂੰ ਟਾਲ ਸਕਦਾ ਸੀ। ਰਿਪੋਰਟ ਵਿੱਚ ਗੇਟ ਨੰ. 26 ਦੇ ਗੇਟਮੈਨ ਨਿਰਮਲ ਸਿੰਘ ਨੂੰ ਵੀ ਘਟਨਾ ਲਈ ਜ਼ਿੰਮੇਵਾਰ ਠਹਿਰਾਇਆ ਹੈ, ਕਿਉਂਕਿ ਉਸ ਨੇ ਸਮਾਂ ਰਹਿੰਦੇ ਹੋਏ ਅਮਿਤ ਸਿੰਘ ਨੂੰ ਲੋਕਾਂ ਦੇ ਰੇਲ ਪਟੜੀ ‘ਤੇ ਮੌਜੂਦ ਹੋਣ ਬਾਰੇ ਚੌਕਸ ਨਹੀਂ ਕੀਤਾ ਜਦਕਿ ਉਸ ਨੂੰ ਇਸ ਗੱਲ ਦਾ ਪਤਾ ਸ਼ਾਮ 5:30 ਵਜੇ ਹੀ ਲੱਗ ਗਿਆ ਸੀ।

ਸਮਾਗਮ ਦੇ ਪ੍ਰਬੰਧਕਾਂ ਉੱਪਰ ਕੋਈ ਠੋਸ ਪ੍ਰਵਾਨਗੀ ਅਤੇ ਸੂਚਨਾ ਆਦਿ ਨਾ ਹੋਣ ਦੀ ਸੂਰਤ ਵਿੱਚ ਰਿਪੋਰਟ ਵਿੱਚ ਉਨ੍ਹਾਂ ਨੂੰ ਵੀ ਕਸੂਰਵਾਰ ਠਹਿਰਾਇਆ ਗਿਆ ਹੈ। ਡਿਵੀਜ਼ਨਲ ਕਮਿਸ਼ਨਰ ਨੇ ਇਹ ਵੀ ਦੱਸਿਆ ਹੈ ਕਿ ਜੇਕਰ ਪ੍ਰਬੰਧਕ 10-12 ਫੁੱਟ ਉੱਚੀ ਓਟ ਕਰ ਦਿੰਦੇ ਤਾਂ ਲੋਕਾਂ ਨੂੰ ਰੇਲਵੇ ਲਾਈਨ ‘ਤੇ ਖੜ੍ਹ ਕੇ ਵੀ ਕੁਝ ਨਹੀਂ ਸੀ ਦਿੱਸਣਾ, ਜੋ ਉਹ ਮੈਦਾਨ ਦੀ ਕੰਧ ਤੋਂ ਪਾਰ ਦੇਖਣ ਲਈ ਉੱਥੇ ਖੜ੍ਹ ਗਏ ਸਨ।

Check Also

ਲਹਿਰਾਗਾਗਾ: ਰੇਲ ਗੱਡੀ ਹੇਠ ਆਉਣ ਕਾਰਨ ਨੌਜਵਾਨ ਦੀ ਮੌਤ

ਰਮੇਸ਼ ਭਾਰਦਵਾਜ ਲਹਿਰਾਗਾਗਾ, 28 ਮਾਰਚ ਦੇਰ ਰਾਤ ਨੌਜਵਾਨ ਦੀ ਸਵਾਰੀ ਗੱਡੀ ਹੇਠ ਆਉਣ ਕਰਕੇ ਮੌਤ …